Madame Mir. A aventura

Había unha vez catro intrépidos ou tal vez "tolos", tres uns e unha unha, que cansos de ilusións que a xente tiña, que eles tiñan tamén e non se facían reais, decidiron crear un mundiño especial e espacial. Especial porque todos eles eran músicos, escritores, xente do teatro…, e espacial porque querían abrir ese mundiño a todas as xentes e lugares. E así xurdiu unha editorial: "Madame Mir", "Madame Mir Edicións", xunto cunha vella aspiración: un estudio de gravación propio: Fábrica de Luz, en Santiago.

 

 

Cando esto escribo, febreiro de 2001 vaise esvaecendo e sobre as nosas costas hai traballo, traballo, traballo, pouco durmir, moito crédito sen pagar e moita, moita ilusión. O estudio xa comezou o seu andar e está precioso, único, cos cadros e pinturas de Xurxo Romero e o toque persoal de César Morais e a amabilidade de Cuca.

Respecto a Madame Mir, xa temos feito "Bestiario de Silencios" (na colección "Espacio de Narrativas", un arrebatador, orixinal, non teño cualificativos, a verdade, libro de Emma Pedreira), está saíndo do forno un riquiño e engaiolante libro infantil (dende 10 anos para adultos): "O estraño misterio das galiñas desaparecidas" de Daniel Buján, (na colección "Soñar en Papel"). Xa temos feito "Pájaros en la cabeza" de "Aínda", un fermoso disco dun especial "cantautor" -a etiqueta quédalle moi curta- do Bierzo, que reside fisicamente en Madrid e sentimentalmente en Galicia. O meu disco en solitario, tantos anos traballado: "Presentimento" vén de camiño, e tamén a testemuña dun gran grupo de folk, un grupo histórico: "Dhais", nun incrible disco "Arman Vela". Todo isto será presentado na segunda quincena de Marzo (toco madeira, non vaia ser), e a partir de entón o futuro desta nave teimosa está nas vosas mans, nos vosos oídos, no voso sentimento. A outra Mir, a soviética, semella que vai caer dentro de pouco; oxalá nós, coa nosa ilusión sexamos quen de subir esta noviña e próxima "Madame Mir" ao espacio para que alí perduren o máis posible os vosos e os nosos desexos mesturados.

 

A nosa idea fundamental en "Madame Mir" é coidar ao autor. Amalo, no sentido profesional e persoal da palabra. E amar, por suposto, a súa obra. Dar todo o moito ou pouco que temos por e para iso.

Debo recoñecer que non estou en "Madame Mir" por ningún tipo de desencontro con "Xerais" ou "Positivas", todo o contrario. Só teño respecto cara a eles, admiración, cariño e palabras de eterno agradecemento. (E agardo poder seguir a publicar algunha cousa con vós, ¿eh?. Se vos gusta, claro). Tratáronme como nós queremos tratar á xente que estea na nosa "casa". Só buscamos ser outra "alternativa", ao lado das existentes pero coas nosas propias características e personalidade.

Respecto da música, tamén debo recoñecer que neste caso son e somos moitos os que pensamos que algunhas compañías galegas poderían facer e ter feito máis por certos productos. Tentaremos non caer neses erros, aínda que sabemos que algunhas delas fan todo o posible, e canto máis nos internamos no mundo da edición (sobre todo discográfica, pero tamén literaria), vemos a chea de atrancos que hai para todo: para que os teus productos estean nas tendas, non digamos nas grandes superficies, para que os medios axuden, para que o mercado abra de verdade as portas, en xeral, vemos os poucos ocos que hai cando non es "moi grande" e, case sempre, de "fóra".

Pero ben, estamos comezando a camiñar. E para saber máis desta "Madame Mir", dos seus productos, ideoloxía, soños e esperanzas, mellor visitade a páxina www.madamemir.com que pouco a pouco se está a construír.

Remato como alí rematan, citando a Roger Waters: "Xuntos resistimos, divididos caemos". A ver se temos sorte e resistimos, ¿vale? Todas e todos. Xuntos.