Poemas para A Rama no aire- (Faro de Vigo).

[Ría do Ocio era un suplemento semanal para a zona do Salnés, que levaba adiante de xeito fantástico Carlos Crespo. Tedes noticia do suplemento no apartado Relatos. O suplemento transformouse en "Los Viernes de Arousa", que perdeu algunha sección de interese pero que tenta seguir aportando cousas á cultura desta zona. Xunto a el, persoas queridas e de gran valía: Xosé Luiz Oubiña (fotografía) e o entrañable e gran artista Anxo Pastor (pintura, poesía, galería de arte "Arcana"), que coordina no suplemento unha sección dedicada á creación, onde se mesturan poemas e fermosas ilustracións de diversos tipos. Aquí algo do que fixen, publicado o 3 de Marzo de 2000]

DIAMANTE

Tomaremos fóra, na calada chuvia,

unha cervexa triste á saúde dos perdidos.

Noite raíña,

apalpar a túa suor fría, enferma,

e crer así en ollos cristalinos limpos.

Resistiremos a humidade dos cansos pallasos

golpeando o noso peito co fume dos feridos.

Noite no circo,

mirar bestas malabares arlequíns, tristes,

e ser todo un saúdo desaparecido.

O teu amigo é o teu amante,

eu son a loucura no camiño,

non importa, nada doe

porque un día atoparei

un diamante no teu doce embigo.

 

DÍAS

 

Marco nunha axenda os días que pasan,

obsesivo rexistro, á fin inútil,

de sensacións esvaradías como o vidro fráxil

escachando en cada páxina absurda,

e tomo chocolate moito chocolate

e teño tanta tanta tanta enerxía

que penso en ascender glorioso a unha lúa tenue

e esquecer o peso que oprime, a gravidade eterna,

e voar ledo lixeiro áxil por outras follas brancas

e nada ten fin e todo é palabra tremente,

e pese a todo, inxenuo parvo, marco os días.