Presentación Insubmisión "Casa Cultura Vilagarcía"

[Evidentemente, non "presentabamos" a insubmisión, ela xa estaba presente e viva en Elías, Ramiro e outros rapaces de Galicia e de todo o estado. Pero, ben, xuntámonos na Casa da Cultura de Vilagarcía unha serie de persoas de todos os ámbitos e cadaquén aportou o seu para tentar deixar ben claro a inxustiza que se estaba a producir cos rapaces e o que pensabamos sobre un tema tan duro.]

                       

                                   A INSUBMISIÓN

A insubmisión é unha desas cousas que aínda fan que conservemos a esperanza no ser humano como especie  con futuro.

É unha idea, unha actitude, un estar no mundo polo que paga a pena seguir loitando coas armas da palabra e do corazón. Paga a pena seguir teimudos ante aqueles que dictan leis, establecen normas e decretos, dirixen as nacións e as vidas que estas levan dentro, co poder da xusta inxustiza, da violencia expresada en represión, intolerancia, exércitos e mortes, sempre mortes que caen sobre eles e sobre a conciencia dunha humanidade empobrecida e alienada.

Non reclamo heroes nin tempos de utopía. Reclamo respecto, admiración e sobre todo, confianza na victoria dos non submisos, na victoria de Elías e Ramiro, na victoria dos seres convencidos de que entre todos abriremos outro camiño. Tiraremos outro muro, outra sanguenta fronteira.

 

 

" (...) A fronteira segue en nós.

 

(...) pensemos no sufrimento inútil

pensemos na útil mercadoría…

e logo, se é preciso

queimemos os inocentes anuncios

as inocentes útiles mercadorías

as inocentes guerras

as inocentes crueldades

feitas por inocentes homes.

 

E logo, se é preciso

queimemos a nosa ruín natureza

de homes inocentes"

                                              

                                               (Xaneiro do 98)