Artigo actuación Albert Pla

            [Este artigo saíu nunha publicación xa desaparecida: "O Cutre", que se autodenominaba "A revista da xuventude vilagarciá", editada pola Concellería de Xuventude e Emprego. O feito era que Albert Pla tocou na "Praza da Pescadería" de Vilagarcía en Decembro do 97, e solicitáronme un artigo dende o "Cutre". Encantado da vida e gracias.]

ALBERT PLA: ARRIBA, ABAIXO

Había xente. Incluso moita. ¿Albert Pla en Vilagarcía? Impensable. ¿¡Que pasará coas nosas orellas virxes e cristalinas?! ¿Que pasará?

O que pasou é que alí estabamos. El, arriba. Nós, abaixo, sentados ou de pé. El dixo cousas que aquí non se escoitan a miúdo "oficialmente". Vinteañeir@s que tiñan chapadas as súas letras coreaban felices (¿Onde estarían os Veintegenarios, Albert? ¿En Alburquerque? Porque habelos, hailos. Aquí e onde ti queiras. E non é un problema de idade, de anos vividos ou por vivir. É algo que ten que ver co material da cabeza).

Así que dixo cousas; mais o asunto non é que diga cousas. O asunto é o xeito que ten de dicilas. Coma un actor-trobador. Domina o escenario. Ten traballados os trucos, a montaxe teatral cada vez máis profesionalmente milimetrada, o vídeo, as luceciñas. E coa guitarra como acompañante-espectadora-confidente, vai largando estrofas cantadas recitadas faladas cuspidas maltratadas. Como el di: "espectáculo multimerda". Pero o máis importante é que ás veces fúndese o espectáculo Pla coa paixón vivida Pla, e entón todo ten sentido. E a figura que semellaba distante, fría, inalcanzable alá no seu mundo, baixa aos nosos mioliños e deixa o poso dos tocados pola variña máxica da arte, do sentimento, das músicas, escenas e palabras que transmiten risas e dores e moitas outras cousas inexplicables. Todo ten sentido neses intres perfectos nos que non hai nin arriba nin abaixo. Pensaremos en ti cando tomemos tapiñas de chourizo, rapazote.